AMA, NARITO ANG IYONG ANAK...
“ANONG oras ba ninyo diyan?”
Sabaysabay,
nagsagutan ang mga nakaupo sa likuran ng diyip.
“Maaga pa ho, Tata.”
Hinawakan
niya, pinigil ang pagkinig ng kanyang kaliwang kamay. Kumurap-kurap siya’t pilit na inaninaw ng
malalabo nang mata ang mukha ng kanyang orasang panggalang. “Sa ‘kin e menos kinse para alas onse.”
Uli
ang mga nasa likuran ng diyip. “Tama, ho
‘yan Tata.”
At ng
tinig sa kanyang tabi, kay Inchang. “Di kaya tayo mahuli.”
Ngunit
hindi na siya nakasagot. Sinasal siya ng ubo.
Si inchang. “Oy bakit? Bakit?”
Ang
mga tinig sa likuran ng diyip. “Tata Senyong...
Tata Senyong... ba’t ho?”
At
naramdaman niya, bumagal ang takbo ng sasakyan.
Unti-unti, lumakad, huminto. Sa
tabi ng tinatalunton nilang lansangan. May
naglapit ng basong may lamang tubig sa kanyang mga labi. Pinalagok siya. May panyong pumahid sa luha ng kanyang mga
mata na nilikha ng sumumpong na dalahit.
May humagod sa kanyang likod. Nang
mahimasmasan siya, kaagad siyang nagyaya.
“Tara na kayo. Bilisan mo nang
konti ang pagmamaneho, Milyo. Baka di
tayo umabot.”
At
binilisan ni Milyo ang pagpapatakbo.
Simbilis ng pagbabalik ng mga gunita.
“SENYONG, ‘sang taon na
tayo...”
“Ay, Inchang, ang pinsan kong si Paz sa
Tabang, e kulang-kulang na sampung taong kasal bago nagkaanak. O baka mahigit pa. Di ko na matandaan.”
“O, e, paanong ginawa nila?”
“Ku, e, me gagawin pa bang iba
yon. Di pareho rin.”
“‘Tong si Senyong. Di iyon ang ibig kong sabihin. Kung nagpagamot sila. O nagsayaw kaya sa Obando.”
“Pareho yata nilang ginawa ‘yon. Nagpagamot.
At nanalangin din ke Santa Clarang pinong pino.”
“Kelan tayo sasayaw?”
“Saka na Inchang. Saka na.”
Ang isang taong pagsasama na di pa
binibiyayaan ng supling, bagamat paminsan ay kinaiinipan niya ay hindi naman
masyado niyang ipinag-alala. Lahi nila
ang nagbibilang muna ng taon bago magkaanak.
Pero nagkakaanak din at iyon ang kanyang pinanghahawakan. Lamang, ang panunukso ay isang bagay ng hindi
nila naiwasan, panunuksong bahagi ng mga usap-usapan sa mga kantong may
tindahan, sa mga pagupitan, sa mga umpukan.
“Ano ba Senyong. Bingi yata.”
“O, baka ikaw naman ang me
diperensiya. Baka nagbunga 'yong
kalikutan mo sa…”
“Tigil nga kayo. Hindi ako kasali sa kalukuhang iyon. ‘La
akong hilig du’n.”
“Hu, kaya pala gabi na’y namimilapil pa
kayo nina Pedro.”
Ang ano mang kantiyawan ay laging
nauuwi sa tawanan. Maliban kung may
kaanghangan ang mga biruan. Kung
harapang tinutukso siya na baka kailangan niya na siya ay lusungan. Alalaon baga’y bayanihan, para lamang
magkaanak. Dito nagpapanting ang kanyang
mga tainga. Dito lamang sumisidhi ang
pagnanais niyang sana, magkaanak na nga sila ni Inchang.
Dinatnan sila ng munting suwerte sa
hanapbuhay. Isang namanang puwesto sa
pamilihang bayan. Mula sa isang
matandang dalagang tiyahin na sumakabilang buhay. Ang pamamahala ng tindahan ay nakalibang sa
kanila. Matagal-tagal ding panahon,
nakalimutan nila ang paghihintay ng isang maaarugang supling. Nang isang araw, may natanawan siyang
isang namumukod na puting buhok sa pusod ni Inchang.
“Oy, ilang taon ka na,” ang tanong
niya.
Nagtatakang sumagot si Inchang. “Treinta’y sinco. Bakit?”
Nag-isip siya. Sa ulo ay may binilang. “Wala pa tayong anak, Inchang.”
Nagtungo sila sa isang kilalang doktor
sa kanilang bayan. May gamot itong
ipinainom kay Inchang. Naghintay
sila. Wala. Lumipat sila ng isa pang doktor. Wala ring nangyari. Patuloy ang paglipas ng mga buwan. Kinakabahan na siya. Sa pakiramdam niya, bumibilis ang kanyang
pagtanda. Ang kanilang pagtanda ni Inchang.
Lahat ng payo ay sinusunod nila. Sira ‘atang regla mo, Inchang. Uminom ka ng pinaglagaan ng dahon ng
tekla. Kapag naayos ang panahon mo’y
magkakaanak ka rin.
May isa pa. Ipahilot mong iyong puson. Sa Da Sepa sa dulo.
Magsayaw kayo sa Obando, sabi naman ng
iba.
Nawawalan na siya ng pag-asa. Walang anak.
Na magpapatuloy ng kanilang pangalan.
Na kakalinga’t aaruga sa kanilang pagtanda. Sisingit sa kanilang usapan ni Inchang. “Baka matulad ako ke Ba Sixto. Walang anak.
Hayo’t me kabuhayan nga’y nawawaldas lang ng kung paano. At ang
itsura. Walang nag-aasikaso. Ke rumi.
Di yata kumakain sa oras.”
Naging mapunahin siya. Mapansinin at mapanuri. “ Ang Tandang Puten
sa Buhangin, tingnan mo, Inchang at
mayaman sa mga anak. May inhenyero’t may
empleyado, may titser. Ang mga apo,
nagkakatibag. Sigurado na ang kanyang
pagtanda. Hanggang sa kanyang huling
hininga ay may aalalay.”
Naging masidhi ang takot niya sa pag-iisa. “Paano kung mauna ako sa iyo, Inchang. Sino’ng mag-aalaga sa ‘yo kung magkaramdam
ka?”
Walang maisagot ang kanyang asawa. Tulad niya, ito’y nag-iisang katawan. “At kung ako naman ang mauna,” itatanong
naman nito.
Ang naging kahulugan ng pagkakaroon ng
anak para sa kanila ay hindi lamang ang pagdating ng isang supling na magpapatuloy
ng kanilang kalahian. O ng isang anak na
maaaruga o mamahalin. Higit at lalo, ang
pagkakaroon ng anak ay naging isang pangangailangan.
Ito ang kanilang mga damdamin nang
dumating ang mga unang tanda.
Madaling araw. Ginising siya ng makabaligtad-sikmurang duwal
ni Inchang. “Senyong... aakkkkk…”
Sa tindi ng paghihintay, ang
katotohanan ay di kaagad nila natatap. “Ano
bang kinain mo kagabi,” nag-aalala niyang tanong.
Wala namang naibang kinain si Inchang. Ano’t umasim ang sikmura.
Pistang bayan sa kanilang tahanan nang
ang lahat ay malinawan. At ang ginawa
niyang pag-aalaga kay Inchang. “Mag-iingat
ka. Liliitan mong iyong mga
hakbang. Baka ka madupilas. Huwag kang magbubuhat nang mabigat.”
Malayo pa ang araw ay kumasundo na siya
ng isang nars. Nang panahong iyon ng mga
hilot. At ang nars na ito ay para lamang
mag-alaga kay Inchang pagdating ng bahay.
Sapagkat naipasiya na niyang sa isang ospital sa Maynila magsisilang
ito.
Nang kabuwanan ay lumuwas na sila ng
lungsod. Nanuluyan sa isang kamag-anakan. Sa unang ramdam ng hilab, nagpatala na sila
ng ospital. At kahit na sinabi ng doktor
na tumingin na hindi pa oras ay hindi na rin sila lumabas. Bakit niya ipakikipagsapalaran ang buhay ng
kanyang mag-ina.
At lalaki ang kanyang unang anak. Una.
At huli. Sapagkat hindi na
nasundan.
Ang walang muwang na sanggol na hindi
pa malay magsalita ay kinausap niya. Ang
lahat ng kasaganaang maidudulot namin sa iyo ay matatamo mo. Basta at kaya rin lamang namin ng iyong
ina. Mapapaiba ka sa mga bata rito, mag-aaral ka. Kakarera. Kung gusto mo ng abugasya, magiging abugado
ka. Huwes pagdating ng araw. Titingalaing malaking tao ng bayang ito. At kung kailangan, mangutang kami para ka
maging doktor, gagawin namin. Ikaw ang
gagamot sa aming rayuma ng iyong ina.
Ikaw ang aasiste sa karamdaman ng aming katandaaan. Ikaw ang aming magiging gabay.
Si Roberto ang magiging gabay. At ang paglaki nito ay masusi nilang sinubaybayan. Ang unang taon sa paaralan.
“Lilimang taon lang ito, Ka Senyong”,
nakangiting tutol ng gurong kanilang kapit-bahay.
“Saling pusa lang, Irene. At kung matalino’y di ipasa mo. Kung di pa kaya,
e, di paulitin natin.”
Kabisote man si Roberto noong una’y
lumabas din ang likas na dunong kalaunan.
Mula grade four, na-accelerate sa grade five. Honor pa nang magtapos ng grade six. At balediktoryan sa high school.
Nang panahong iyon ay nauuso na ang pag-alis-alis
ng mga doktor, ang pagtungo sa ibang bansa.
Iyon ay kanilang kinatakutan ni Inchang.
“Hindi natin kaya ang medisina, Roberto. Matatanda na kami at baka hindi ka namin
matustusan ay lalo ka lamang maalangan.”
Pinili ni Roberto ang inhenyerya at
kaiba sa karaniwang mga magulang, habang ito'y nag-aaral ay inalalayan na nilang
maipakilala sa mga dalagang maaaring magustuhan at maligawan. Sapagkat ang pagpapamilya ay isang pag-uugat. Noon ay nabalitaan na nilang marami ring
inhenyero ang nangingibang-bansa. Nang ang ligawan ni Roberto ay isang
kababayan, lubusang natahimik ang kalooban nilang mag-asawa. Si Roberto ay tunay nang kanila. Gabay ng kanilang katandaan. Suhay sa kanilang buhay.
SA ORASAN nakatingin si Roberto, ngunit ang nasa ulo niya ay ang
kanyang ama’t ina.
“Ikaw
ang aming magiging gabay sa aming katandaan, Roberto. Ikaw lamang ang aming anak. Huwag mo kaming pababayaan. Huwag mo kaming iiwan.”
“Bakit
ko kayo iiwan,” ang ganting tanong niya.
“Pag-aasawa
mo,” pasumala ng kanyang ina.
Nilingap
niya ang kanilang maluwang at maaliwalas na kabahayan. “Ang laki ng bahay na
ito.”
“Tama,”
sambot ng kanyang ama. “Kaya natutuwa
kami ng iyong ina na ang napili mo ay isang kababayan. Tiyak na hindi siya tututol na manirahan sa
aming piling.”
Ngunit
doon sila nagkamali ng haka. Iba ang
nasa isipan ni Clarita. May sarili itong
balak sa hinaharap na buhay may-asawa.
“Uupa
tayo ng apartment na malapit sa ating pinapasukang opisina at ang impok buhat
sa ating suweldo ay ihuhulog natin sa isang lote,” ang wika nito.
“Apartment? Lote?
Ano’ng ginagawa ng bahay namin sa probinsiya. Ang laki at ang luwag. Kahit sampung maging anak natin.”
“Sampu!” Nanlaki ang mga mata ni Clarita. “Parang di mo nababalitaan ang population
explosion kung magsalita ka.”
Tumawa
siya. “Gusto kong bumawi. Nag-iisa yata ako.”
Ang
unang pag-uusap na iyon ay nauwi sa tawanan, kurutan. Ngunit bago pormal na niyaya niyang pakasal
si Clarita ay muli niyang inungkat ang nasabing bagay.
“Nag-iisa
lamang akong anak, Clarita. Inaasahan ng
aking mga magulang na sa kanilang piling ko ipipisan ang aking mapapangasawa,
ang aking magiging pamilya.”
Matagal
na hindi nakaimik si Clarita. “Nauunawaan
kita, Roberto. Kaya lamang, marahil ay
mauunawaan mo rin ako kapag sinabi kong higit na gusto kong nakabukod tayo sa
mga magulang mo.”
“Mababait
naman sila, Clarita. Mamahalin ka
nila. Nang malaman nilang ikaw ang
nililigawan ko’y natuwa sila. Sinabi sa
akin.”
“Mabait
nga sila, Roberto, pero iba-iba ang ugali ng mga
tao. Ako sa aking sarili, ang gusto ko’y
malayang pagkilos, malayang pagpapasiya sa munti man o malaking bagay. Kung kapisan natin sila, Roberto, hindi mo
iaalis na di sila makialam sa atin.”
“Makialam
man sila, Clarita, nangangahulugan lamang iyon na nais nila tayong matulungan
sa ating mga suliranin.”
“Ugali
ko rin ang humingi ng tulong sa ikalulutas ng aking mga suliranin. Ngunit ang mga payong hindi ko hinihingi at
ibinibigay sa akin ay hindi ko nagugustuhan.
Sa akin, iyon ay pakikialam.”
“Clarita…”
“Mahal
kita Roberto. Mahal na mahal.”
“Hindi
ko mabibigo ang aking mga magulang. Nag-iisa
lamang ako, Clarita. Wala silang ibang
maaasahan. Iba ang anak sa kamag-anak
lamang. Hindi ko sila maaaring iwan.”
“Kahit
para sa akin, Roberto… kahit para sa akin…”
“Huwag
mong pahirapan ang ating sarili, Clarita.
Hindi ko maaaring ipagpalit ang aking mga magulang sa iyo kung paanong
hindi kita maaaring ipagpalit sa kanila.
Iba ka. At iba sila. Ngunit kapwa ko kayo mahal kaya nga kita kinausap bago mapag-usapan ang
ating kasal.”
“Kasal? Ang ibig mong sabihin, Roberto, ay ibinabatay
mo sa magiging bunga ng ating pag-uusap na ito ang katuparan ng ating
pagpapakasal?”
“Clarita,
hindi mo ako nauunawaan.”
“Nauunawaan
kita, Roberto. Lubos na lubos.”
Nagdamdam
sa kanya si Clarita. Ngunit paano niya
maipauunawa rito na hindi niya maaaring iwan ang kanyang mga magulang. Nag-iisa lamang siyang anak. Siya ang gabay. Ang suhay.
Iyon ang damdaming itinanim sa kanya, dinilig at inalagaan mula sa
kanyang kamusmusan. Iyong damdaming hindi
na pinangangatwiranan. Iyon ay nadarama
lamang. At walang bagay na maaaring mag-udyok sa kanya
upang lisanin ang matatanda nang magulang.
Kahit na si Clarita. At sapagkat mahal na
mahal niya si Clarita at talos niyang hindi rin siya liligaya kung di rin
lamang ito ang makakaisang-palad niya, si Clarita ang dadalhin niya sa piling
ng kanyang mga magulang.
Dinalaw
niya si Clarita sa kaserang tinutuluyan nito sa lungsod. Hindi siya pinakiharapan. Sinundo niya ito sa opisinang
pinapasukan. Nagdahilan itong may ibang
tutunguhan. Sa telepono ay nagpapakaila. Sa bahay sa probinsya ay sasandaling nakipag-usap,
may mahalagang gagawin daw.
Isang
panahong nawala si Clarita sa kanyang buhay.
Ngunit sa dahilang ganap ang kanilang pag-ibig sa isa’t isa, muli silang
nagkabalikan. Ang pagsuko ay kay Clarita
nagmula at sapagkat kilala nga niya si Clarita, alam niya ang katibayan, katatagan
ng kaloobaan nito, ang ginawang pagsuko ng dalaga sa kaniyang kahilingan ay
nakaantig sa kanyang damdamin. Iyon ay
isang malaking pagpapakasakit para sa kanyang kasintahan. Lahat, alang-alang sa pag-ibig nito sa
kanya. Kaya noon ay matiim niyang
naipangako sa sarili na gagawin niya ang lahat upang mapaligaya ito.
Napakasal
sila ni Clarita. At pumisan sila sa
kanyang mga magulang. Mahigit na isang
oras lakbayin ang kanilang lalawigan hanggang lungsod kung saan sila kapwa nag-oopisina. Nakita niya ang matinding antok ni Clairta
kapag ginigising na sa madaling araw upang makapaghanda sa pagluwas. Hindi kaila sa kanya ang pagod ng magbiyahe
araw-araw, umaga’t gabi, maghapon pang nagtatrabaho. Ngunit wala siyang narinig sa asawa.
Mahilig
si Clarita sa bahay, alam niya. Ngunit
hindi ito nangahas na baguhin ang ayos ng kanilang pamamahay na ang kanyang ina
ang nakaaalam. Iba ang henerasyon ng
kanyang mga magulang at iba ang sa kanila ni Clarita ngunit nakita niya kung paano
pinag-aabot ito ng asawa sa pamamagitan ng malawak na pag-unawa at di
kakaunting pagpapakasakit, ganap na pag-ibig sa kanya.
At sa
kabila nga ng lahat, maligaya sila. Ang
kanyang mga magulang. Sila ni Clarita. Hanggang dumating sa kanilang buhay ang matagal
na nilang inaasam. Nagdalantao si Clarita.
“Kambal
sana,” ang sabi niya, “lahi kami ng kambal.”
Ang
sinabi niya ay pinatotohanan ng kanyang ina.
“Ang ama ng aking ama ay may kakambal.
May isa akong pininsan na nanganak ng kambal.”
“Sabi
ko na sa ‘yo,” ang wika niya sa
nagtatawang asawa. At totoo sa kanyang
loob ang pagnanasang kambal ang maging anak.
Kambal
nga ang anak ni Clarita. Kapwa
lalaki. Magkamukhang-magkamukha. Maliban sa isang bagay na kaagad nilang
napuna at hindi nakaligtas sa pagsusuri ng mga doktor na tumingin. Ang unang isinilang ay malusog, masigla,
rosas ang kulay at punung-puno ng buhay.
Ang ikalawa ay mababang lubha ang timbang, maputla ang balat at
nangingitim ang labi’t mga kuko ng paa’t kamay.
Ang
katotohana'y ipinagtapat sa kanila. "Ang
isa ninyong anak ay isang blue baby."
Blue
baby. Gimbal ang kaloobang pinakinggan
nila ang paliwanag ng mga doktor.
“Kailangang isailalim siya sa matamang pagsusuri mula ngayon hanggang sa
kanyang paglaki. Hindi siya isang
karaniwang bata at ang kanyang magiging mga pagkakasakit, sipon man ito o
ordinaryong lagnat ay nangangailangan ng hindi pangkaraniwang paggagamot. May problema kayo sa inyong mga kamay.”
Hindi
miminsang narinig niya, naikwento sa kanyang paglaki ang suliraning dinala ng
kaniyang ama sa hindi kaagad nito pagkakaanak.
Ang lubhang napakatagal na pagdating niya sa buhay ng kanyang mga
magulang. Ngayon, iba ang suliraning
kinasusuungan niya. Pinaging-dapat na
sila ni Clarita ay magkasupling kaagad, at kambal pa, ngunit may karamdaman
naman ang isa. Ang buhay nito ay
nakasalalay sa kanyang mga kamay, sa kanyang pagpapasiya.
Ang
sabi ng doktor. “Kailangan siyang
operahin bago sumapit ang kaniyang puberty.
Higit na mainam kung sa mga edad anim o pitong taon iyong bata at di pa
lubhang aktibo sa mga paglalaro. Kapag
lumampas pa doon, baka hindi na makaya ng kanyang puso.”
Sinubaybayan
nila ni Clarita ang paglaki ng kanilang kambal.
Ang kalusugan at kasiglahan ng isa ay naghahatid ng lalong lumbay tuwing
makikita nila ang kahinaan ng ikalawa.
Madali itong mapagod sa paglalaro.
Kung hanapin mo’y makikitang nakatalungko sa isang tabi, nangingitim ang
mga labi, kinakapos ng hininga.
Ang
paliwanag ng doktor. “Ang kaso ng bata
ay ang tinatawag na tetralogy of fallot.
Apat na depekto. May butas sa
pagitan ng ventricles. Makitid ang
pulmunary valves. May overlapping ang
aorta. Lumalaki ang puso.”
Ang
paliwanag ay tinapos nito sa isang payo.
“Ipaopera ninyo siya sa Amerika.
Marami tayong mahusay na doktor dito ngunit naroon ang pinakamagagaling
na facilidad. Sa ngayon ay wala pa
tayong ganoon. May mga kaso na naikukuha
ng mga sponsor. Mga foundation. Ang ibig kong sabihin, ay libre na ang
operasyon. Ang babayaran na lamang ninyo
ay ang hospitalization. Magtanong-tanong
kayo. Sa mga kamag-anak ninyong nasa
Amerika na. Inuulit ko, dalhin ninyo
siya sa Amerika.”
Amerika.
Amerika.
Kumunot ang noo ng kanyang ama. Nagdilim
ang mukha ng kanyang ina. Amerika.
Malumanay
na nagsalita ang mga ito. “Sino ba ang
gustong mamatayan ng anak. Napakasakit
ang bagay na ito. Ngunit kung talagang
kalooban ng Diyos na kunin siya sapagkat siya ay hindi para sa inyo, bakit
natin tututulan ang kanyang kalooban.”
Noon
lamang niya nakitang lumuha nang ganoon si Clarita. At halos nawalat ng kanyang dibdib sa
damdaming nadama.
LAMPAS ng ikalabindalawa ng tanghali. Hinagod ng tanaw ni Mang Senyong ang restoran
sa ibayo ng lansangan. “Dito bang
talaga, Inchang?”
May
sumagot. “’Yan na nga ho, Tata. Hayan ang pangalan. Eleven.
Diyan natin makikita si Roberto.
May construction kasi sa airport.”
Si Roberto. Sa pakiramdam ni Mang Senyong ay parang
mapupugto ang kanyang hininga. Hindi
niya maihakbang kanyang mga paa. Ngunit may kamay na umalalay at umakay sa kanya. “Tena, Tata.”
HINAYAAN ni Roberto na maunang sumakay sa shuttle bus si Clarita at ang kambal. “Aantabayanan ko sila sandali. Darating na siguro.”
Tumayo
si Roberto sa harap ng restoran. Sinuyod
ng kanyang mga mata ang mga nakaparadang diyipni, kotse at trak sa gilid ng
kaharap na lansangan. Nilisa niya ang
mga taong naglisaw.
Nang
sinundang gabi, nang huli niyang makita ang mga magulang ay nakahiga ang
kanyang ama. May sumpong ng hika. Hinahagod niya ang dibdib, hinihimas niya ang
likod ay tinatabig ang kanyang kamay.
Ang kanyang ina. Ang kanyang ina
ay hindi siya pinapansin. Nagpapaalam
siya, inaabot niya ang kamay upang magmano ay bigla siyang tinalikuran.
Ang
hapdi ng luhang nasa likod ng mga mata at ayaw tumulo ay naramdaman ni Roberto. Tatang... Inang… ang bulong niya, ang hiyaw
ng kanyang kaibuturan.
At sa
muling pagkurap ni Roberto ay saka lamang niya nasilayan ang mga magulang na papalapit
na sa kanyang kinatatayuan. Sugod na
sumalubong siya sa mga dumarating.
Kaagad ginagap ang kamay at
dinala sa mga labi. At hindi kaagad
inalis sa pagkadikit sa kanyang pisngi. “Tatang...
Tatang… bendisyunan mo kami.”
“Roberto...
matanda na kami ng iyong ina.” Nabasag ang tinig, ang hukot na mga balikat
ay niyanig ng impit na hagulgol.
Hinapit
ni Roberto sa dibdib ang lantang katawan ng ama, ang manipis na kabuuan ng
ina. “May awa ang Diyos, Tatang, Inang. May awa ang Diyos.”
Naramdaman
ni Roberto ang paggulong ng luha sa kanyang pisngi, ang pagpatak ng mga ito sa
kaputiang iyon sa kanyang dibib, sa mga ubang iyon na lalong nagpapatingkad
sa katotohanang matatanda na nga ang
kanyang mga magulang.
Naramdaman
ni Roberto ang kamay ni Clarita sa kanyang balikat. “Aalis na ang bus.”
Humigpit
ang mga yayat na bisig sa pagkakayakap
kay Roberto. Tumabingi ang kurbata at
nalukot ang solapa ng amerikana sa pagkadakot ng mga butuhang kamay. Ang pigil na hikbi ay naging impit na panangis. “Anak ko, Roberto…”
“Anak
ko…”
SA LIKOD ng nakagiwang at kinakalawang na bakod na bakal na
kinakaliwa ng tore at kaibayo ng viewing deck ng nasunog na Manila International
Airport, nakatayo si Mang Senyong at si Aling Inchang. Bahagi ng isang sangkatauhang nagtitiis sa
tindi ng katanghaliang araw. Ang mga
mata ay nakapako sa isang papataas, papalayong dambuhalang saasakyan.
SA ITAAS, ang panalangin ay nasa puso ni Roberto para sa mga iniwang
magulang. Kung paanong ako’y inyong mahal at ayaw ninyong kayo’y aking iwan, ay
gayon ding kamahal ko ang aking anak, gayon ding kasakit sa akin, marahil ay higit pa, kung mamamatay siya’t kami ay
maiiwan nang wala kaming ginawa upang siya ay mabuhay. Dalangin ko ang inyong pag-unawa, ang ating
muling pagkikita. Makaraos lamang si Kambal, maipaghanap-buhay lamang
namin ang kabayaran ng inutang naming panggastos sa ospital, babalik kami, Tatang...
Inang... uuwi kami....”
SA IBABA, itinaas ni Mang Senyong ang kanyang kamay. Ikinaway sa eroplanong hindi na matanaw. Saka binalingan ang asawang tahimik na
umiiyak.
“Tahan na Inchang. Tahan na.
Gagaling na ang ating apo. Ayaw
ka ba noon. Uuwi sila kaagad, pangako
ni Roberto. Daratnan pa nila tayong buhay. Inchang..."
Liwayway,
Hunyo 12, 1972
No comments:
Post a Comment