Kuwento sa Liwayway ngayong Setyembre

ISANG  BUNGKOS  NA  LIHAM

Nakatago pa ba ang mga sulat ninyong tinanggap noong araw mula sa isang itinatangi? Na kahit naghiwalay ng landas noon ay sadyang hindi isinauli? O kung nagkatuluyan naman, paminsan-minsan ay binabalikan at muling ninanamnam ang tamis ng mga pangungusap na nakasaad doon. O binabasa sa iba pang kadahilanan?


Isang kaibigan ang nagkuwento na ang mga sulat na itinago niya noon at iniwan sa probinsiya ay nilamon na ng apoy, tinangay na ng usok. Sabi raw ng kanyang ama ay pinagpistahan ang mga ito ng anay kaya nito sinigan. Laking panghihinayang niya kasi ay wala siyang maipakitang ebidensiya sa kanyang nakaisang-palad na si ganire at si ganoon ay sumusulat sa kanya noon. Bagaman sabi raw naman ng kanyang asawa, kahit wala siyang ebidensiya, ramdam nito na si ganire at si ganoon ay nagkimkim talaga ng pagtatangi sa kanya. Lalaki sa lalaki, alam nila. Sabagay, kahit naman mga babae, napapakiramdaman nila kung may ibang nagkakagusto sa kanilang asawa o boyfriend. 
 
Ang kuwento ko sa Liwayway ngayong Setyembre ay tungkol sa isang bungkos na liham, matiyaga at buong pagmamahal na tinipon ng dalawang nagsusulatan. Lalabas na ito sa susunod na linggo.
 
Bumili na agad, baka maubusan!