‘Wentong may ‘Wenta – 4 – Sa Botika
Una muna ay isang tanong: alam pa kaya ng marami sa mga
kabataan kung ano ang botika? Bukod sa pagiging tongue twister na botika,
bituka, butiki? Ito kasi ang kinagisnan
naming tawag sa drugstore, na tinatawag rin ng iba na parmasya. Kasi ngayon,
basta bibili ng gamot, Mercury ang nasa isip.
O generic.
Ang kwento ko ay napagmasdan ko lamang na naganap sa loob
ng botika. Ang binibili ko ay out of
stock doon at kukunin pa raw sa ibang kalapit na branch kaya pinaupo nila ako
sa silya sa tabi ng eskaparate ng mga inuming nakalalasing na nasa gawi ng
senior citizen’s corner. Dahil ang
pagbili lamang ng gamot ang aking sadya, enjoy na lang ako sa panonood ng mga
mamimili.
Sa katabi kong bakanteng silya ay may pasadlak na naupo.
May kabataan pa ito. Agad kong tinanong
ang babae, “Senior ka ba? Pang-senior iyan,” biro ang sa akin ngunit hindi ako
ngumingiti.
“Sinusumpong ho ako ng sinusitis, hindi ako makahinga,
nagpatingin ako sa doctor, tumaas daw blood pressure ko,” paliwanag nito.
Tinapik ko braso niya, “Biro lang,” at ngumiti na ako.
Tinanong ko kung ilang taon siya, sinabi niya, sinabi kong ganoon din ang edad
ko nang magsimula ang aking high blood at pag-inom ng gamot.
Hindi raw siya iinom ng gamot. Maghe-herbal na lamang siya.
Inayunan ko siya. Nariyan ang acetaba, ang
pansit-pansitan, ang takip-kuhol, ang oregano, ang bawang, ang luya, ang
turmeric. Kaso, ako’y naumpisahan na sa
gamot.
Kaya nga nakaupo ako doon at
naghihintay.
‘Wentong may ‘Wenta – 5 – Sa Botika – The Old Lady in Red
Umalis ang babaeng kausap ko. Nilapitan ako ng taga-botika, malapit na raw
dumating iyong inutusang kumuha ng aking gamot. Halata ang valued customer, na
buwan-buwan ay naghuhulog ng pera sa botika, asikaso.
May nakita akong dumarating, naglalakad sa aisle, na
isang matanda, talagang over-the-senior, iyan ang tawag ko sa mga
lampas-lampasan ng sisenta. Pulang-pula
ang suot niya. Pulang makipot na jogging
pants, hakab na sa binti, kaya kitang-kita ang paglakad nitong pasakang-sakang.
Pula rin ang printed na blusa na three fourths ang manggas. Mapula-pula rin ang
kulot na buhok. At pati bitbit na eco-bag ay pula rin. Papunta siya sa
kinaroroonan ko.
Hindi ko napigilan, nagkomentaryo ako, complimentary
naman. “Wow, the lady in red!”
Matipid ang kanyang ngiti na may acknowledgment naman
pero walang sinabi.
Tuluy-tuloy siya sa eskaparate ng mga inuming nakalalasing.
Dinampot ang isang Novellino. At nagpunta na sa kahera.
Wow, wine, gamot rin sa high blood, di ba?
‘Wentong may ‘Wenta – 6 – Sa Botika pa rin, Ang
Makwentong Lalake
Hindi nawawalan ng mamimili sa dakong kinauupuan ko dahil
ito nga ang Senior Citizen’s Corner.
Isang lalake ang dumating. Matangkad, mataba at malaki, mabilog ang
tiyan. Kinuha niya ang katabi kong
bakanteng silya at ipinwesto sa malayu-layo sa akin, kalihis ng kinaroroonan
ko. Noon ko napuna ang mga binti at paa
niyang namamaga, nangingitim.
Kinausap niya ako agad. “Ang hamon ba, iyong square na balut-balot, kapag wala sa
refrigerator, kailangang prituhin agad?” tanong niya.
Tumango ako.
“Dapat,” sagot ko.
“E, kung ilagay sa ref, magtatagal?” tanong ulit.
“Oo, bahagya.”
“Isang taon?” ang tanong.
“Aba, hindi. Kung sa freezer, medyo tatagal nang
bahagya.” Saka ko napansin ang dala niyang plastic na supot, kung anu-ano ang
laman. Medyo hinanap ko doon iyong sinasabi niyang hamon. Wala. Ang nasa loob ng supot ay basyong bote ng
tubig at mga abubot.
Tumigil siya saglit sa pagkausap sa akin. Kasunod ay
hinimas niya nang hinimas ang mga binti at paa.
Hindi ko na ito tiningnan, bagaman at kita sa sulok ng aking mga mata
ang kanyang ginagawa.
Huminto siya at tumingin sa akin. “Maganda ba? Galing sa
ukay-ukay,” ipinarangalan niya ang suot na polo, kulay dilaw. “Pwede rin sa
lalake, unisex daw ito,” dugtong pa.
“A, oo, pwede,” tugon ko naman, habang saglit na
pinagmasdan siya.
“Matitiis ko ang dumi, pero gusto ko’y malinis na damit.
Ang hinubad ko’y sobrang gulanit na,” patuloy na wika.
Sa pagsulyap-sulyap sa kanya ay nakita kong malinis naman
siya, makinis ang mukha, parang bago pang pagupit. At may hitsura, matangos ang ilong, maganda
ang mata, matino ang pagsasalita.
Pamaya-maya, kinalabit niya ang ilang seniors na nakatalikod
sa kanya at naghihintay ng mga binibiling gamot. “Lola… Lola… tulong naman para
dito…” at sa mga lumingon, itinuro niya ang namamagang binti at paa.
May nagbigay ng pera, beinte pesos, nakita ko. Naisip ko kung magkano kaya ang aking ibibigay
pag hiningan ako.
Ngunit hindi niya ako hiningan. Kalaunan ay tumayo na siya at umalis.
Dahil hindi niya ako hiningan, may naalaala tuloy akong
isa pang ‘wento na may ‘wenta na nangyari sa akin maraming taon na ang
nakalipas. Pero hindi sa botika nangyari
kundi sa loob ng bus.
Punuan ang bus na papuntang Baclaran. Siksikan.
Katabi ko ang isang lalaki na kalaunan ay tumayo at hinoldap ang isang
pasahero sa unahan.
Nagtatawa ang lahat ng mga kinuwentuhan ko nito. Katabi na raw ako, e, bakit iba pa ang
hinoldap. Mukha raw kasi akong walang
pera!
Kaya ba ako hindi hiningan noong makwentong lalake? Halatang walang pera?
O dahil harapang nakipag-usap ako sa kanya
nang matino?
No comments:
Post a Comment