Sino"ng nakabasag ng pinggang pino?

        May ugali ang aking kasama sa bahay na matagal ko nang pinuna at ipinababago ngunit walang nangyari. Hindi raw niya alam kung bakit siya ganoon. Laging bitin kung  siya ay maglagay ng mga babasaging pinggan o baso sa mesa. Para bang cantilever kumbaga sa mga gusali. Natural, madalas siyang mabasagan ng pinggan. Huwag na nating bilangin kung ilan, kulang ang dalawang kamay ninyo. In fairness, in the span of many years naman.

       Kaya ko lamang nabanggit ito ay dahil sa sinundong gunita sa akin ng mga salitang "nabasag ang pinggan". May naalaala akong laro ng aking kamusmusan. Kumpleto Ito sa aksiyon na may katambal na dayalog. Dito ako nahinto sa dayalog. May parte akong Hindi maalaala. Baka naman natatandaan pa ninyo, o may Lola kayong matatanong, ipaabot ninyo sa akin. Ganito iyon.

        Marami kaming batang nakaupo (upo, hindi nakasalampak) sa lupa. Kunwari  ay naghuhukay kami ng mani. Ang bunga ng mani ay nakabaon sa lupa. Sinasabi namin-

        "Kutkot mani, kutkot mani..."

         Sasabihin ngayon  noong lider na nakatayo sa harap namin- "Sino'ng nakabasag ng pinggang pino?"

         Iyong sagot namin ay may kinalaman sa daga. Hindi ko nga maalaala. ????

        Sasabihin ng lider. "Bakit hindi sinaway?"

       Sagot namin. "Walang malay."

       Sasabihin noong lider. "Suot sa lungga."

       Ang gagawin namin ay parang tatayo ng magkaharap, hawak braso at ang nasa hulihan ay susuot sa ilalim ng mga braso namin hanggang lahat kami makagawa nito.

       Ewan ko ba kung paano natatapos ito. Baka may makaalaala, ikuwento nga ninyo kung paano.