Kuwento ng Pebrero at Marso 2016 sa Liwayway

Kuwento ng Linggo sa 
Pebrero at Marso 2016 
sa Liwayway

Narito ang pabalat ng Liwayway kung saan matatagpuan ang mga kuwento ko.

Sana ay makatagpo pa kayo ng mabibiling sipi nito.

Kislap ng Pag-ibig sa Karimlan - Ito ay kuwentong pang-Valentine. Naaalaala pa ba ninyo ang mga nakaraang Valentine sa inyong buhay? Nang may nanliligaw o nililigawan kayo? Sabik sa paghihintay ng araw na ito ng mga puso. Nakahanda na ang panregalo sa minamahal. Binibilang na at kinukwenta ang perang panggastos sa restoran na kakainan. Noon kami, pa-Max-Max lang. Isipin mong sa beinte pesos, may pantaksi na, pansine at fried chicken pa sa Max. Iyong medyo mataas na ang sinusweldo, Aristocrat siguro. Baka Sulo pa. Ang mga daily lang ang kita, pwede na ang Wah Nam o Ma Mon Luk, o halo-halo sa LIttle Quiapo. Pero ang tanging masasabi ko, kaming mga bunga ng henerasyong iyon na may ganoong uri ng Valentine Celebration, e, still going strong pa rin ang pagsasama sa ngayon. 

Senior's Sleepover - Hindi ko naranasan ang makitulog sa ibang bahay noong maliit ako. Ngunit nang maging teenager at nag-aral sa Maynila, paminsan-minsan ay niyayaya ko ang aking mga kabarkadang babae (pinsan at kababata) na matulog sa aming bahay. Hindi sila lumuwas at nag-aral, kaya nagkakasabikan kami ng kwentuhan. Sa sala ng aming bahay ay maglalatag kami ng mahabang banig sa may tabi ng bintana kung saan binubuksan namin ang bentanilya kaya nasisilip pa rin at naririnig ang mga nagdaraan sa kalsada. Magkakabit kami ng malaking kulambo at magkukwentuhan ng aming mga crush. Natatandaan ko pa ang isang gabing maulan, panay ang kidlat at kulog. Sa tuwing makikislapan kami ng liwanag ng kidlat, magsisigawan kami. Feeling namin ay flash ito ng kamera at kami ay kinukuhanan. Sabik pa kami noong makodakan. Sa bayan namin, si Topico lamang yata ang may kamera at studio at kung kaibigan ka niya, marami kang litrato. Di tulad ngayon, lahat ng celfone, may kamera na yata. 

Sa mga sleepover, marami ang napagkuwentuhan. Kung sa mga seniors ngayon ito mangyayari, ang kuwentuhan siguro ay iikot sa kung anong maintenance na gamot ang iniinom at kung ilang operasyon na ang nadaanan, na siyang sinisisi kung bakit nagiging malilimutin. Gawa raw ng anaesthesia. Oo na... ayaw pa kasing aminin...